ಭಾರತೀಯ ಸಿನಿಮಾ ಇತಿಹಾಸದಲ್ಲೇ ಸಂಪೂರ್ಣ ಮಡ್ ರೇಸ್ನ ಸಿನಿಮಾ ಬಂದಿಲ್ಲ. ಇದೀಗ ಆ ಸಾಹಸಕ್ಕೆ ಹೊಸಬರ ತಂಡ ಕೈ ಹಾಕಿದೆ. ಚಿತ್ರರಂಗ ಅಂದ್ಮೇಲೆ ಹೊಸ ಹೊಸ ಪ್ರಯತ್ನಗಳು ಆಗ್ತಾನೇ ಇರುತ್ತೆ. ಇದೀಗ ಅಂಥದ್ದೆ ಮತ್ತೊಂದು ಹೊಸ ಪ್ರಯತ್ನ ಕೈ ಹಾಕಿರೋದು ನಿರ್ದೇಶಕ ಪ್ರಗ್ಬಾಲ್.
ಅಂತಾರಾಷ್ಟ್ರೀಯ ಮಟ್ಟದ ಸಿನಿಮಾ ನೀಡ್ಬೇಕು. ಇಡೀ ವಿಶ್ವವೇ ಈ ಸಿನಿಮಾ ನೋಡುವಂತಾಗ್ಬೇಕು ಎಂಬ ಉದ್ದೇಶದಿಂದ ಅಷ್ಟೇ ದುಬಾರಿ ವೆಚ್ಚದಲ್ಲಿ ಸಿನಿಮಾ ನಿರ್ಮಾಣ ಮಾಡಲಾಗುತ್ತಿದೆ. ಈ ಚಿತ್ರಕ್ಕೆ ಮಡ್ಡಿ ಎಂಬ ಶೀರ್ಷಿಕೆ ನೀಡಿದ್ದು, ಬೆಟ್ಟ, ಗುಡ್ಡ, ಕೆಸರು ಸೇರಿದಂತೆ ಕಡಿದಾದ ರಸ್ತೆಯಲ್ಲಿ ಈ ರೇಸ್ ನಡೆಯೋದ್ರಿಂದ ಮಡ್ಡಿ ಎಂದು ಶೀರ್ಷಿಕೆ ಇಡಲಾಗಿದೆ.
ಇದು ಭಾರತದ ಮೊದಲ ಮಡ್ ರೇಸ್ ಸಿನಿಮಾ ಎಂದು ಚಿತ್ರತಂಡವೇ ಹೇಳಿಕೊಂಡಿದೆ. ಟೈಟಲ್ ಅಷ್ಟೇ ಅಲ್ಲದೆ ರೋಚಕವಾದ ಕಥೆ ಕೂಡ ಈ ಸಿನಿಮಾದಲ್ಲಿದೆ. ಪಿಕೆ7 ಕ್ರಿಯೇಷನ್ಸ್ ಮೂಲಕ ಪ್ರೇಮಾ ಕೃಷ್ಣದಾಸ್ ಮಡ್ಡಿ ಸಿನಿಮಾವನ್ನ ನಿರ್ಮಿಸುತ್ತಿದ್ದಾರೆ. ವಿಶೇಷ ಅಂದ್ರೆ, ಹೊಸ ಸಿನಿಮಾ ಮಡ್ಡಿ ಪ್ಯಾನ್ ಇಂಡಿಯಾ ಸಿನಿಮಾ. ಕನ್ನಡ, ತೆಲುಗು, ತಮಿಳು, ಮಲಯಾಳಂ ಮತ್ತು ಹಿಂದಿಯಲ್ಲಿ ಈ ಸಿನಿಮಾ ಸಿದ್ಧವಾಗಿದ್ದು, ಅಡ್ವೆಂಚರಸ್ ಆ್ಯಕ್ಷನ್ ಶೈಲಿಯ ಚಿತ್ರವಾಗಿದೆ. ಶೀಘ್ರದಲ್ಲೇ ಟೀಸರ್ ರಿಲೀಸ್ ಮಾಡೋ ತರಾತುರಿಯಲ್ಲಿದೆ ಚಿತ್ರತಂಡ.
ಮಡ್ಡಿ ಚಿತ್ರದಲ್ಲಿ ನಟಿಸಿದ ಕಲಾವಿದರೆಲ್ಲರೂ ಡ್ಯೂಪ್ ಇಲ್ಲದೆ ನಟಿಸಿದ್ದಾರೆ. ವಿಶೇಷ ಅಂದ್ರೆ, ಇವರೆಲ್ಲರೂ ಹಲವು ಶೈಲಿಯ ಮಡ್ ರೇಸ್ನಲ್ಲಿ ಪರಿಣಿತಿ ಪಡೆದಿದ್ದಾರೆ. ಕೆಲವು ಸನ್ನಿವೇಶಗಳಲ್ಲಿ ಒಟ್ಟು 13 ಕ್ಯಾಮರಾಗಳನ್ನು ಬಳಸಿ ಶೂಟ್ ಮಾಡಲಾಗಿದೆ. ಕೆಜಿಎಫ್ ಸಿನಿಮಾ ಖ್ಯಾತಿಯ ರವಿ ಬಸ್ರೂರು ಸಂಗೀತ ನೀಡಿದ್ದು, ಹಾಲಿವುಡ್ ಸಿನಿಮಾಗಳ ಛಾಯಾಗ್ರಹಣ ವಿಭಾಗದಲ್ಲಿ ಕೆಲಸ ಮಾಡಿರುವ ಕೆ.ಜಿ ರತೀಶ್ ಈ ಸಿನಿಮಾಕ್ಕೆ ಕ್ಯಾಮರಾಮನ್.
ನಿರ್ದೇಶಕ ಪ್ರಗ್ಬಾಲ್ ಬರೋಬ್ಬರಿ ಐದು ವರ್ಷಗಳ ಕಾಲ ಮಡ್ ರೇಸ್ ಬಗ್ಗೆ ಅಧ್ಯಯನ ನಡೆಸಿದ್ದಾರೆ. ಮಡ್ ರೇಸ್ ಹಿನ್ನೆಲೆ ಇಟ್ಕೊಂಡು ಕಥೆಯನ್ನ ಹೆಣೆಯಲಾಗಿದೆ. ಎರಡು ತಂಡಗಳ ನಡುವಿನ ಸ್ಪರ್ಧೆಯನ್ನು ಈ ಸಿನಿಮಾದಲ್ಲಿ ತೋರಿಸಿದ್ದು, ಫ್ಯಾಮಿಲಿ ಸೆಂಟಿಮೆಂಟ್, ಭಾವನಾತ್ಮಕ ಅಂಶಗಳು ಮತ್ತು ಕೆಲವ ಸಾಹಸಭರಿತ ತಿರುವುಗಳನ್ನೂ ಕಾಣಬಹುದಾಗಿದೆ. ಬಹುತೇಕ ಹೊಸಬರೇ ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಯುವನ್, ರಿಧಾನ್ ಕೃಷ್ಣ, ಅನುಷಾ ಸುರೇಶ್, ಅಮಿತ್ ಶಿವದಾಸ್ ನಾಯರ್, ಹರಿರ್ಶ ಪೆರಾಡಿ, ವಿಜಯನ್, ರೆಂಜಿ ಪೆನಿಕರ್ ತಾರಾಗಣವಿದೆ.
